Hevur tú hug at førleikamenna teg, at fáa eitt netverk tvørtur um ítróttagreinar og fáa íblástur til komandi kappingarár?
So er eitt skeið hjá ÍSF nakað fyri teg - sí lýsing niðanfyri.
Skeið fyri venjarum - Venjari 1
-Ítróttur fyri børn og ung
-Ítróttur og venjing
-Ítróttaskaðar - nei takk
Tann 23. og 24. november 2013 verður skipað fyri enn einum skeiði fyri venjarum. Grundskeiðini eru løgd saman, soleiðis at tað bæði er skeið 1: Ítróttur fyri børn og ung, og skeið 2: Ítróttur, venjing og skaðar.
Byrjað verður leygardagin kl. 9.00 til 20.30 og sunnudagin verður hildið fram frá kl. 9.00 til 17.00. Skeiðið verður í ÍSF-húsinum í Havn.
Evni:
Ítróttanámsfrøði, ítróttaumhvørvi, menning hjá børnum, venjing, trygd og ábyrgd, etikkur og moralur. Hví venja? og hvussu? Upphiting, anatomi, fysiologi, venjingarprinsippir, undirvísingarprinsippir.
Skeiðið skiftir ímillum at vera teoretiskt og praktiskt, so tá er gott við ítróttaklæðum.
Ongin próvtøka er, men kravt verður, at uppmøtingin er 100%. Eftir lokið skeið, verður luttøkubræv útflýggjað.
Skeiðið er ein partur av venjaraútbúgvingini hjá DIF, Danska Ítróttasambandinum. Møguleiki er sostatt at byggja víðari upp á skeiðið.
Málbólkur:
Venjarar, hjálparfólk og leiðarar hjá børnum og ungum. Øll sum hava áhuga í og ábyrgd av børnum og ungum, sum luttaka í ítrótti.
Hvat fært tú burturúr:
-Vitan um menningina hjá børnum, fysiskt, psykiskt og samfelagsligt.
-Tú lærir nakað um námsfrøði, venjarar av ymsum slag, at seta sær mál, um týdningin av góðum ítróttaumhvørvi.
-Ítøkilig hugskot til spøl og venjing hjá børnum og ungum.
-Vitan um, hvussu kroppurin virkar, og hvat ein má taka hædd fyri í samband við venjing. Grundleggjandi vitan um venjing og fyrsiologi. Vitan um, hvussu ítróttaskaðar kunnu fyribyrgjast og um týdningin av rættari uppvenjing, um skaðin er hendur.
Upptøkutreytir:
Luttakari skal vera 15 ár ella eldri. Tó kunnu frávik gerast frá regluni um upptøku, um serstøk viðurskifti tala fyri hesum.
Luttøkugjald:
Kostnaðurin fyri skeiðið er 650 kr. Íroknað er frálærutilfar og matur.
Tilmelding:
Tilmelding fer fram á heimasíðuni hjá ÍSF, og gjaldast skal við tilmelding. Seinasta freist at melda til er 10. november 2013.
GG! Avboð givin 10 dagar áðrenn skeiðsbyrjan kosta 50% av upprunakostnaðinum, og eftir tað er ikki møguleiki at fáa peningin endurgoldnan.
Tað er pláss fyri 25 luttakarum. Skeiðið verður hildið, treytað av at minst 15 luttakarar tilmelda seg.
Meira fæst at vita frá ÍSF-skrivstovuni, tlf. 312606
Venjarar hjá Støkk eru vælkomnir at luttaka. Eftir lokið skeið verður kostnaðurin endurgoldin frá felagnum.
