Betri

Fjølbroyttur fimleikur í frálíkum umstøðum
16. mars 2015
Bylgjan hevur í vikuskiftinum verið karmur um árligu fimleikaframsýningina hjá felagnum.

Framsýningin, sum varð skipað í trimum pørtum, byrjaði leygarmorgunin við børnum undir skúlaaldur, og helt síðani fram bæði leygar- og sunnudagin, har liðini frá 1. flokki og upp eftir vóru meira blandað.

Til allar tríggjar framsýningarnar var høllin fullsett av foreldrum, ommum og abbum og øðrum, ið vóru komin at hyggja, meðan børn og vaksin framførdu.

Felagið hevði nógvan fjølbroyttan fimleik at sýna fram. Tað sást, at fimleikararnir hava fingið nógv burturúr hendan fimleikaveturin.

Hetta er fyrstu ferð, at felagið hevur framsýning í nýggju Bylgjuni, og sigast má, at umstøðurnar nú eru framúr góðar til slíkt tiltak. Serliga riggaði tað væl, at fimleikararnir hildu til í fimleikahøllini, meðan sjálv framsýningin var í ítróttahøllini. Eisini var tað sera ómakaleyst við amboðunum, tí nú skuldu tey bara flytast frá fimleikahøllini og yvir í ítróttahøllina.
Samanumtikið eitt sera væleydnað fimleikavikuskifti í Bylgjuni.

Breiddarliðini hava nú steðg fram til heystið, tá eitt nýtt fimleikaár byrjar. Tó venja kappingarliðini nakað aftrat.

Myndir frá framsýningardøgunum eru at síggja í myndasavninum!